اجمل 4 قصائد مشهورة

قصايد مشهورة


القلب من كثر الهواجيس قزان
          مايستريح من الدهر ربع ساعه

ياغافر الزلات ياوالي الاحسان
       تجعل من التقوى لنفسي بضاعه

انا علي لان وربعي علي لان
              متخالف رايي وراي الجماعه

ماني بشاري غير بت من الضان
           يقنع باشراك البهم في رضاعه

انا ولد علي سلايل كحيلان
              وربي خلقني للسبايا وداعه

الناس ماتسقيك لاصرت عطشان
       ولايشرب المظمي خذا من ذراعه

اضرب علي الكايد لياصرت بحلان
        عند الولي وصل الرشا وانقطاعه

عيب علي اللي يتقي عقب مابان
     ويرضى طمان النفس عقب ارتفاعه

اما تجيب عقود حص ومرجان
          والا فهي لأ بليس طار بشعاعه

وطرابة الدنيا مع الفجر دخان
          واكرارة باطراف خطو الصماعه
( عبيد الرشيد )

يالله ياللـي كـل الأمـات ترجيـك
            يا واحـدٍ ما خـاب حـيٍ ترجـاك

يا مرقبٍ بالصبـح ظلّيـت اباديـك
            ما واحـدٍ قبلـي خبـرتـه تعـلاك

وليت يا ذا الدهر ما اكثـر بلاويـك
         الله يزودنـا السـلامة مـن أتـلاك

ياللي على العربـان عمت شكاويـك
        وليت يا دهـر الخطـا ول مقـواك

واليـوم هالكـانـون غـادٍ شبابيـك
        تلعـب به الأريـاح من كل شبـاك

يا مالك اسمع جابتـي يوم أوصيـك
      واعرف ترى يا بوك بامرك وانهـاك

وصيـةٍ مـن والـدٍ طامـعٍ فيـك
 تسبق على السـاقه لسـانه لعليـاك

أوصيك بالتقـوى عسى الله يهديـك
           لهـا وتـدركـها بتوفيـق مـولاك

الله بحـق أجـدادك الغـر يعطيـك
      رضاه مع كل ما تمنـى من امنـاك

احفظ دبشـك اللي عن الناس مغنيـك
      اللي إلـى بان الخـلل فيـك يرفـاك

واعرف ترى مكـة ولاها ابن اخيـك
    لو تطلبه خمسـة دواويـن معطـاك

اجعـل دروب المرجلـة من معاليـك
     وادراج سيّسـها على العـز مرقـاك

لا تنسـدح عنـها وتبغينـي أعطيـك
        جميـع ما يكفيـك ما حـاصـل ذاك

احـذر امـر ليعـات أبيـها لتاليـك
        ايضا ويرخص عنـدها قدر مـأواك

أدّب ولـدك إن كان تبغيـه يشفيـك
     واستسعفـه من بعـد مربـاه بـالآك

أما سمـج واستسمجـك عند شانيـك
      ويفر من فعلـه صديقـك وشـرواك

وإلاّ بعـد جهلـه تـرى هو بياذيـك
           لـو زعلـت أمـه لا تخليـه يـالاك

واحذر تضيع كل من هو ذخر فيـك
      معروفه لا تنسـاه واوفـه العرفـاك

ترى الصنايع بين الاجـواد تشريـك
          إلـى طمعـت بركزهـا لا تعـداك

واحذر سرور بغبة البحـر يرميـك
    ولا عنده افلس من تجزعك وابكـاك

واوف الرجال حقوقـها قبل تعنيـك
        لا تعتمـد بالعفـو فـالحـق يقفـاك

وهرج النميمة و القفا لا يجـي فيـك
      واياك وعرض الغافـل اياي وايـاك

تبـدي حديـث للنـاس فيه تشكيـك
   وتهيم عند الناس بالكـذب واشـراك

واذا نويـت احـذر تعلـم بطاريـك
    كم واحد تبغي به العـرف واغـواك

واحذر شماتة صاحب لك مصافيـك
      والى جـرا لك جـاريٍ قال لـولاك

ولا تحسـب إن الله قطـوعٍ يخليـك
   ولا تفرح إن الله على الخلـق بـداك

إن اشتـهى حط الطمـع في تواليـك
     لو ما لقيتـه يا فتـى الجـود يلقـاك

والضيـف قـوم لـه حيـن يلفيـك
    مما تنوشه يا فتـى الجـود يمنـاك

اكرم قبالـه فانـها مـن شواديـك
    وابـذل له المجهـود ما دام يعنـاك

واحذر تلاقي الضيف مقرن علابيـك
     خلـه محـب لك صـديق إذا جـاك

وأوصيك زلات الصديق إن عثا فيـك
 ما زال يغطاها الشعـر فاحتمـل ذاك

راعـه ولـو ما شفـت انه يراعيـك
      عسـاك تكسـر نيّتـه عن معـاداك

واحذر عـدوك لو بقا بي يصافيـك
       عود الجنـا واطعنـه حينـما جـاك

لا تامنـه فاطلـب مـن الله ينجيـك
       ويكفيـك ربـك شــر ذولا وذولاك

شفنـي أنا يابـوك بآمـرك وانهيـك
     عن التعـرض بين الاثنيـن حـذراك

وإذا حضـرت طـلايبٍ مع شرابيـك
    اسـع لهم بالصلـح والـلاش يفـداك

ابـذل لهـم بالطيـب ربـك ينجيـك
      لا تجضـع الميـزان مع ذا ولا ذاك

أمـا الشـهادة أدّهـا إن دعوا فيـك
      بيّن عمود الدين لا عميـت اريـاك

بالـك تماشـي واحـد لك يرديـك
   طالع بني جنسـك وفكـر بممشـاك

رابـع أصيـل في زمانـك يشاكيـك
 وإلى شاف خملاتك عن الناس غطاك

واحذر عن طرد المجفـي حذاريـك
       عليـك بالمقبـل وخـل من تعـداك

ثـم العـن الشيطـان ليـاه يغويـك
       تـرى إن تبعتـه للشّـرابيـك وداك

واوصيك لا تشكـي علينـا بلاويـك
   أنت السبب اخـذك عيـونك بيمنـاك

واعرف ترى اللي وطا الفهر واطيك
      ولا أنت أعز من الجماعة هـذولاك

المسك يا راسي عن الذل واخطيـك
        واحـذر تكلـم يا لسانـي حـذاراك

والطف بجـارك ثم قم دون عانيـك
    وافطن إلْما يعنيك عن ربعة أخـواك

يا ذيب وان جتك الغنـم في مفاليـك
      فاكمن إلى حيـث الـرعايا اتّعـداك

مـن أولٍ يا ذيـب تفـرس بياديـك
     واليوم جا ذيبٍ عن الفـرس عـداك

يا ذيب عاهدني وأعاهدك ما رميـك
        مرميك أنا يا ذيـب لو زان مرمـاك

والنفس خالف رايـها قبـل ترميـك
    ترى لها الشيطـان يرمـي بالادراك

ومن بعد ذا لا تصحب النذل يعديـك
  وعن صحبة الأنذال حاشاك حاشـاك

ترى العشير النذل يخلـف طواريـك
     وأنا أرجي إنـك ما تجي دون آبـاك

والهقـوة انك ما تجـي دون أهاليـك
        ولا ذكر عود الـورد يثمـر بتنبـاك

والحر مثلك يستحي يصحـب الديـك
     وان صاحبه عاعا معاعات الاديـاك

لا تستمع قـول الطـرف يوم يلفيـك
    بالكذب يقضي حاجتـه كل ما جـاك

من نـم لك نـم بك ولا فيه تشكيـك
           والاَّه قــد أزرا رفيقــك وأزراك

عندك حكا فينـا وعنـدي حكا فيـك
         وأصبحت كارهنـا وحنـا كرهنـاك

ما اخطاك ما اصابك ولو كان راميك
     واللي يصيبك لو تتقيـت ما اخطـاك

مير استمع منـي عسـى الله يهـديك
           النصـح يـا مـالك لك الله مـولاك

عنـدي مظنـة مـا تمثلتـها فيـك
    واطلب لك التوفيـق من عند مـولاك
( بركات الشريف )

يالله يالمطلوب يا والي الأقدار
            أنت الذي مدّات جودك لطيفه

يالله يالمعبود عاون هل الكار
                 تحل شطاتٍ عليهم كليفه

اللي مجالسهم بها بن وبهار
              ونجرٍ يصوّت للهشالا رجيفه

مكارمٍ للضيف أصيلات وكبار
           ومفطحاتٍ في صحونٍ نظيفه

يا مزنةٍ غرا من الوسم مبكار
              اللي جذبنا من بعيدٍ رفيفه

تومر على كل المفالي بالأمطار
           تصبح به خدان قومي مريفه

غب الحيا فاحت بها ريح الأزهار
              تخالف النوّار مثل القطيفه

ترعى بها قطعانّا سر وجهار
       تقطف زهر مرباعها مع مصيفه

يبني عليها الشحم بنية جدار
    عقب الضعف راحت رجومٍ منيفه

قطعانّا ما ترتع دمنة الدار
       ترعى زماليق الفياض النظيفه

ترعى بها وضحاً من الذود معطار
          غبوقة الخطّار عجلٍ عطيفه

ترعى بضف الله ثم جبران وجبار
              خيالةٍ يوم الملاقا عنيفه

إن سوهجوا عنها قليلين الأبصار
   من دونها نروي السيوف الرهيفه

ماهي حكاية مسردٍ عقب ما نار
    اللي نكس وأطراف رمحه نظيفه

حنا كما مشخصٍ عن الصرف ما بار
       بالوزن يرجح والمصاري خفيفه

هذا ولك الله من قديمٍ لنا كار
       عن جارنا ما قط نخفي الطريفه

حنا نرى في زلة الجار لو بار
       تضحك حجاجه بالعلوم اللطيفه

نرفى خماله رفية العش بالغار
      ونودع له النفس القوية ضعيفه

ولا نبدي الخافي ليا صار ما صار
        يفلج قصير البيت لو بان حيفه

ونكرم سبال الضيف حق وتعبّار
          لامن ولد العفن شح برغيفه

الجار لابده مقفي عن الجار
            وكلٍ بجيرانه يعد الوصيفه

نبغي ليا من بدّل الدار بديار
          وعقب البطا كلٍ تذكر وليفه

كلٍ تذكر ما جراله وما صار
      وكلٍ تذكر ما جراله من عريفه

لابدها ترجع تواريخ وأذكار
  وتبقى لدسمين الشوارب وظيفه

أحدٍ على جاره بختري ونوّار
       وأحدٍ على جاره صفاةٍ محيفه

الصبر مفتاح الفرج هو والأفكار
  ومن لا صبر تصبح أحواله كسيفه

خطو الولد مثل البليهي ليا ثار
         يا زين حمله ليا تمدرا زفيفه

يشدي هديب الشام حمّال الأخطار
     زودٍ على حمله نقل حمل أليفه

وخطو الولد مثل النداوي ليا طار
     حسّه على صيد الخلا له وحيفه

ترجي العشا في مخلبه وقع وطيّار
       صيده سمان ولا يصيد الضعيفه

وخطو الولد ينبش على موتة النار
      مع العرب يشبه لخطوى الهديفه

ليا بخصته ما سوى ربع دينار
            صفرٍ على عوده تضبّه كتيفه

وخطو الولد يا مال قصّاف الأعمار
             لا نافعٍ نفسه ولا منه خيفه

وصلاة ربي عد ما خضّر الأشجار
          على نبيٍ له شريعة شريفه
( مقحم النجدي )

التايه الي جاب بصري يقنه
     هيض جروح العود والعود قاضي

جينا نحب ونطلب الله جنه
           جنة نعيم يوم يابس الحاضي

ياليت كانت حبتي في معنه
      يوم العيون عن الخوامل غواضي

يامن يعاوني على وصف كنه
          اشقح شقاح ولاهق بالبياضي

الريح لازفرة ولاهي مصنه
         ريح النفل بمطمطمات الفياضي

نهدين للثوب الحمر شولعنه
           حمر ثمرهن واقفات غضاضي

والخد ذابوح القلوب المرنه
             براق مزنٍ لاعق اللون ياضي

ياليت لو سني على وقم سنه
                 بايام مابيني وبينه بغاضي

أيام جلد الذيب عندي محنه
      نصبح وزرق الريش لهن إنتفاضي

ياجرح قلبي جرح وادي وطنه
           غر المزون اللي وطنه وفاضي

البيض قبلي محسنٍ عذبنه
     ونمر على وضحى جرا له عراضي

والبيض كم ٍ واحد ٍ يبسنه
      يبسة شماشيل العذوق النفاضي

عزي لمن غر الثنايا كونه
       واركن على كبده كوايلٍ عراضي

الى ارتوى بستان قلبي سقنه
   واخضر جنابه عقب يبست الحاضي

القلب غضات الصبايا شعنه
       بنت الشيوخ مخدمين الحياضي

شوفي بعيني والخدم يركبنه
          على زعاع يوم قوطر وناضي

فوق اشقح من زمل ابوها مضنه
      ركبة عليه اتشنطح ٍ باعتراضي

وامشجر من سوق هجر مغنه
    على خياطة نابي الارداف راضي

وين انت يامشفي على طردهنه
     انا طويت ارشاي وقفيت قاضي

انا صدرت ووردهن عقبنه
     على العدو مشرعات الحياضي

احد بوسط النار واحد بجنه
   وترى البخيت اللي له الرب راضي
( بصري الوضيحي )