اجمل شعر سعد بن جدلان

الشاعر سعد بن جدلان ، من اجمل ماقال في الشعر



قصيدة ياجميله

كل دار ارجعت وانا سناوي
عزتي للي سواتي عزتي له

زادت الحمى ورحنا للمداوي
والمداوي زود الحمى مليله

ياجميله قام يطوي الحال طاوي
والله ان كبدي على شوفك غليله

والله ان قلبي على الاما شفاوي
غير مافي يدي ولا فيدك حيله

سجليني في علم حبك فداوي
انا مجنونك عقب مجنون ليلى

يارقبت الخشف ياعين النداوي
ياسراجيف الذلول المستحيله

يامناة تنقصر عنها المناوي
ياخيار الدهم يالقب الاصيله

لعنبوك انتي مكاسر عود جاوي
ملبسك سندس شرابك سلسبيله

لو تمرين الشيوخ اهل الفتاوي
عودو مثلي يجرون الطويله

من عشق شرواك والا لايهاوي
التقيد من بعض الاشياء فضيله

***

ونّ ابن جدلان من لايعٍ لاعه
كن في كبدي دوافير صناعي

العب المنكوس واحب روباعه
مملٍ بالوقت والوقت خداعي

ما دريت ان ضحكة الوقت خداعه
شفت مدخالي ولا شفت مطلاعي

لا بغيت اسج والا انبسط ساعه
دق قلبي من ورى حدب الاضلاعي

كن ما بين الضلوع آلة اطباعه
تشتغل لا نمت واقوم مرتاعي

هم قلبي ما يفرق تجمّاعه
غير جر الصوت والناس هجاعي

فاقدٍ لي سلعةٍ واكبر بضاعه
سلعةٍ تشرى ولا هيب تنباعي

رفقة الطيب ليا غير اطباعه
اشهد انها كيةٍ توجع اوجاعي

راكب اللي صممه صاحب اصناعه
جمس بيك اب من حديثات الانواعي

الغريب اللي جديدٍ من انواعه
حوض رفرف ما يبي شد واشراعي

لا انّس البنزين عجلٍ تفرقاعه
مخطرٍ من سرعته يقلع اقلاعي

لا تحرك شفت في القاع مشلاعه
والتواير تظهر الماء من القاعي

ينعش القلب الحزين بتهملاعه
لا مشى قام يتهملع تهملاعي

لا وطى الارض العتش كن تهزاعه
بنت شيخٍ طامحٍ من ولد راعي

في رجاء الغايب تحرى لمرجاعه
تنقد العشاق وتطق الاصباعي

نفسها من جملة الناس منصاعه
ماتبي الا واحدٍ ذكره يشاعي

ينحر اللي ياخذ الطيب بذراعه
الصديق الصافي الصامل الواعي

الوفاء والطيب ساسه ومنباعه
يوم بعض الطيب تقليد واصناعي

لا وصلتوا فاخبروني عن اوضاعه
واخبروا راعي السمارى عن اوضاعي

انشدوا ويش السبايب بمهزاعه
لا علي ناقص ولا ابيه فزاعي

ودنا نرضيه ونحاول اقناعه
كان ابن مهمل بعد يسمع الداعي

كان يبغى حق للحق قطاعه
نقنعه والحق ما عنه مجزاعي

وكان مبغض في الرجاجيل بتاعه
لا يجي ناقد ويلحقني ارياعي

لصديق نخلي النفس خضاعه
ما نوريه الجفا والتمطاعي

الصداقه عندنا ذخر واطماعه
صحبةٍ ماهي بصحبة تمتاعي

حد جدتها على البرق لماعه
وان خذت يومين مفعولها ضاعي

فن تلايمنا على العز والطاعه
وان تفرقنا فجوج الله وساعي

ما اطرد المقفي ليا صفط اشراعه
مخبل اللي للمقفين تباعي

من يحط اذنه على كل سماعه
جاه فرقا ما بعدها تجماعي

والزباد اختام هرجي ومطلاعه
يدفعه من ريحة المسك ذعذاعي

ــــــ

قصيدة الشدائد

الشــــدايد يـــــا جميـــله بالازمات اختبار
ينــعــرف فيـها الضلال الطويل من القصير

كل مــــاذكر حالتك بين غـــــار وبين نـــار
راحـــت الــدنيـــا بعيني عبــــوسٍ قمطرير

تحسـبــن حبــك محــاه التشدد والحصار
التشـــدد في المحبـــه هو الشر الشرير

شغلهم ضـــدي وضــدك يعمـّـر لك وقــار
في ضميــــرٍ مــاسكـن فيـه قدامك عشير

زارعٍ لك بخشـــةٍ مــن الزرار الى الزرار
نبتـهـا ملمســـك والعـــود الازرق والعــبير

شد حيـــلك لا يصيبــك فشل وإلا إنهيار
لا تصغــر قيمتـــك وانـت في عينـــي كبير

لذة صبـــــار الهــوا مثـــل لــذة الانتصار
لا تصدق من يقـــــول الحســـد مافيه خير

لا تغيـــرب مـــاجرا مـن قنـــا مثلك يغار
كـــل شي ينشفـــا فيـــه ميصـــاله عسير

الذهـــب دونــه حـراسه وبيبــاٍنن كبــار
والدرر مــن دونها هيبـــة البـــحر الغــــزير

غير لاتيّــس و تكتـب على نفسـك قرار
يدفعك ســــوء التصرف على بئس المصير

لولا شحــي فيـك جيتك أجاهر من نهار
غيــــر ما يصـــلح مقــــام بـــلا راي بــصير

فرصتـي ويقت حـــرارٍ على مــاكر حرار
مــا يــعــــود فـــالمحل الربيــب إلا البـعير

والله ان امـــوت ما جـاك من عندي بوار
خــل في قلبـــك ثقــه والثقــه كنز الضمير

خذ كلام اللي يشـــوفك بعيـــن الاعتبار
واحــــدٍ مــــالك بقلبــه ولا عقــله خــشير

والمحبه مدرسة شي ثبوت وشي فرار
وانت درسي مع هل الحب الاول والاخير

ـــــ

أنا وين أبلقى يالاجاويد فاعـل خيـر
حريصٍ على سرّ المحبيـن لارسلتـه

أناّ لوّ أبصبر عام مابـان بـي تأثيـر
وهالحين حتّى الصبر يومين ما أحتلتـه

أنا مثل صقـارٍ تولّـع بحـبّ الطيـر
ولف قلبه فـروخ الصورايـم وهبلتـه

تولعّت في فرخٍ قضيـبٍ يتـلّ السيـر
ابيّ نظرتٍ من لفتـة الحـرّ وسبلتـه

صغيرٍ بسنّه غير عندي ماهو بصغيـر
يامغلاه فـي قلبـي وياكبـر منزلتـه

أجمعله سمان الهرج خوفٍ من التقصير
والى جيت ابشرح له كلامي تهيزلتـه

يجيني منّه هيبه . معزه سحى  تقدير
اقابلـه عنـدي علـم وأروح ماقلتـه

ــــــ

ودّنا بالطيب بس الدهر جحّاد طيب
كل ماتخلص مع الناس كنك تغشهـا

يدك لامدت وفا لاتحرى وش تجيب
كان جاتك سالمه حب يدك وخشهـا

كل ماشـبـيت نار المحّبه مع حبيب
قام يسحب فـي مشاهيبهـا ويرشهـا

كل ماواجهت لك في الزمن وجه غريب
مثل ما قـــال المثل دام تمشي مشها

وذمةٍ ماهيب تندان للحق المصيب
جعل قشاش الحطب لاسَرح يقتشهـا

ـــــ

ياعنـــا القنـــاص يالصيد المّدسم
ياكتاب الشمس وكتــاب الطلاسم

أمسك أعصابي وإذا شفتك تّبسم
كنك تكويني على الكبد بمياسم

كن بيــاضك مـن حــمارك لاتقّسم
عارض في وجنتك موكب مراسـم

حبكم سيـطر على قلبي ورسّـــم
مثل ماسيطر على بغـــداد قاسم

ـــــ

زاومنـي الهاجـوس ملعـون أبـو الأهـل
يقـول البـيـوت العـصـم وإياك و إياها

لا عيّنت كلمة قلت يضـرب بهـا المثـل
لقـيـنـا وراهــا كـلـمة كـّنـهــا إيــاهــا

ما تنجح مدارس فلسفـة علـم فـي جهل
والعربان ما كلٍ يقـدر يكسـب رضاهـا

يحاول قـدر الإمكـان يعنـي علـى الأقـل
يدخل في مفاهيم العرب يكسب اصغاها

ـــــ

يا زين المشي في االروض الخضر لا شعشع المخضار
يازين الدير ة اللي من حقوق الوسم ممطورة

يريح البال سجٍ في الفياض الخضر والمسيار
سعادة للقلوب اللي من السلوان مســــرورة

متى عيني تشوف اللي على قلبي ربيع ودار
أشاهد للسعادة في حياة المجتمع صـــــورة

لا هلت مزون فوقهن تنعومتين صغار
على ذيك اللباب اللي من الرضوان مغمورة

لا منه أصحى سماغر المزون وشعشع النوار
ودجاه أدلى سدوله والقمر متجلي نــــــوره

أشاهد لي بروق دونها ربانها تندار
تقول أكباس غاز من ورا شلال نافورة

سبح ماهر خيالي في الخباري والبرد والنار
وأشوف الجمر فوقه دلة الرسلان منحورة

هذاك المنظر اللي ما تشوفه في الحياة أمرار
على شوفه سبابيح الخيال تموت مقهورة

حرام إني ما أهني راع المليون والمليار
ولا أهني عربسات الفضا دوره ومقدوره

أعيش بعالم طول المدا يبقى لها تذكار
عليّه بالحرام انها حياةٍ مالها جوره

هذا وجه الصحيح ولا على وجه الصحيح غبار
حقيقة ويتمعنها اللبيب بكامل شعوره

ـــــ
الا ياالله ياللي تحـت هيبـة سلطنتـك اسلمـت
لك المسلم يسبح لك بحمـدك ولـك الاسلامـي

احمدك واشكرك واثني عليك بما علـي انعمـت
تزودني وفا قـدر العشيـر ووصـل الارحامـي

ولجك الفجر ياليل الذهول اللـي علـي اضلمـت
يعرضك واقع الماضي بعيني عـرض الافلامـي

ولهتك يالنديم اللي على صافي وفـاك اضرمـت
بصفحة ذكريات العام واللـي مـن ورا العامـي

بعد تقرير مشوار التجـارب نجحـك واجزمـت
بان السيف سيفي والعصـا والمحـزم احزامـي

عطتني عزلة اخلاصي معك نسيان مـن نادمـت
كتبتك وانطوت صحفي عليـك ورفعـت اقلامـي

اباهـي لا ابالـي واتبيسـط كــل ماقـدمـت
اشـب النـار قـدام العـرب واشيـد اخيامـي

نهاري حر شمسه يستحي منها لسـان الشمـت
وليلي ترقب نجومـه ملامـة كـل مـن لامـي

على ضو الكلام اللي كشف عنا ستـار الصمـت
عرفت اني تحت برق الامل في روض الاحلامي

احسب انك تيمم با اتجاهـي ويـن مـا يممـت
واثر ما انت بورايه في الطريق ولانـت قدامـي

مصيبه لاتدنت قيمتك فـي عيـن مـن قيمـت
يشوفك بالسهل وانته تشوفـه بالسمـا السامـي

كثر ماحن قلبي للونيـس وكثـر مـا درهمـت
فجر صدري حنينـي واتعـب الاقـدام درهامـي

عيون الصد وعيون التجافي حول مهما اكرمـت
تشـوف المجتهـد كسـلان والبنـاي هدامـي

مدام ان جانبك شام لجنابي وانت عنـي شمـت
كثر خيـرك وانـا مانيـب لاجايـع ولاضامـي

اشوف انه علي واجـب ليـا مريتكـم سلمـت
مرور اكرام تربطـه الكرامـه عنـد الاكرامـي

على شان الخفوق اللي على عرشه قعدت وقمت
حجب عنك الدجى لين اشرقت لك بيض الايامـي

ختام السالفه ياطيـب العشـره كرمـت ودمـت
هذا حقك علي وحق شرهاتـي علـى اوهامـي

مصير الوقت يشرح لك دروسه وان غفلت ونمت
يصحيك الزمان اللي يصحـي كـل مـن نامـي

تذكرني لامنها خابـت اوهامـك فمـن وهمـت
وشفت الفرق في حب الخشوم وحـب الاقدامـي

ـــــ

آه يا قلب ياللـي دايـمٍ فـي ذهـول
والله انـه ثقيـلٍ ليـن جــوه الثـقـال

يا قطـاة العبيّـه يـا هيـام الـذلـول
يـا عيـون النـداوي يـا رقبـة الغـزال

نور وجهك على من شاف منـك القبـول
نور صبـحٍ تبسّـم فـي رهـاد الجبـال

كنّي اقـرا علـى طـرّت جبينـك تقـول
انـا قلبـي يحبـك يـا حبيبـي تـعـال

كـان قدّمـي حـدٍ فالحـب راح امهبـول
والله انـه خطيـرٍ لا يجينـي اهـبـال

المحبـه جملـهـا مـرسـلٍ وامعـقـول
لعنبـو مـن يقـول ان المحبـه اخـبـال

والذي ليلـة الاسـراء عـرج بالرسـول
ان حبـك لحـال وحـب غيـرك لحـال

ـــــ
يا راكب اللّي مصنعه في الولايات
اللّي مريكا في المصانـع تصبـه

تصميم شركة كلاهان الخواجـات
اموردة من نيويـورك ونصبـه

أكبر مكينـه سقّطـت للونيتـات
واحد صفر واحـد ودبـه ودبـه

ما يصدر الا عن طريق القطاعات
حتى سبيراتة تجي فـي اسطبـه

وبالجدول السري خذته الوكـلات
ومديرهـا وقّـع وعاهـد بربّـه

وصدفه طلع بالواسطه والحيالات
ثم قيل يا سـوّاق أخـذه وغبّـه

ساعة فتح بابه عطوه السويكـات
شغّل ولا الماء مع كزوزة يكبـه

قام إيتسمع وش تقول القـزوزات
لياهي تقول ابغـاك ممـه وببّـه

ـــــ

الله يرحم بوك وأمك ويلحقك بهـواك
كــــلنا للي تـقولـــين أذانٍ صــاغية

أنت مطغـيك البها لين حدد مستواك
يعني أكبر مجرمة حب وأكبر طاغيه

شوفتك للي فؤاده مريضٍ في حراك
جنــــــــةٍ ما ينسمع في طرفها لاغيه

أنا يوم أغليك.. وآجيك.. وآدور رضاك
باغيه نفسي!! ولا أدري وشنهي باغيه..

ـــــ

لاتخالفت المماشـي تخالفـت الـدروب
مـع مـن يعنيـك ويقـدرك وتـقـدّره

والبشر محدٍ على شف غيره بمغَصوب
مـن بغالـه شعـب فيسنـده ويحّـدره

والأدمي ماهوب يدري بسـدات الغيـوب
وارد المـا مايدلّـه يـاكـود مـصّـدره

ولا تجيك الحصبه الا من فراش امحصوب
وحبة الجدري تجي من فـراش مجّـدره

ـــــ

بعدالأمل تتعب دونه النـاس ماوصلـوه
حتى تجتمع فى ساعةالحشر منحشـره

الوجه المشبب كلمتـه مالهـا مسفـوه
والأقشر يواجه قشرالأنصاد من قشـره

تلقى مبغضين الآدمي كثر مـن حبـوه
على وجه سابعة الأراضيـن منتشـره

والدنيا تمد النـاس بالخيـر والمكـروه
في خيراتها شتّى وفي شرّهـا خشـره

و سمات البخت لا شافوا النور ما غطوه
واقوى رابطة في الزاد والملح والعشره

واللي يجهل المشروه لا يلحق المشروه
ورجّــــــال تعـداه المشاريـه لا يـشـــــره

والألباب لآمر الكـلآم المفيـد أوحـوه
وتفصيل الخبر يكفي عنه موجز النشره

***

أف .. ياكبر الاحلام اللي على بالي وشفي
وأخ.. ياراسي من التفكير في من لا يشونه

وأح .. ياحر انتظاري للقبول من المقفي
وآه .. ياحب عطيته لناس مايستاهلونه